اسلام آباد: پاکستان پیپلز پارٹی (پی پی پی) نے وزیراعلیٰ پنجاب مریم نواز سے مطالبہ کیا ہے کہ وہ اڈیالہ جیل میں پاکستان تحریک انصاف (پی ٹی آئی) کو دی جانے والی سہولیات کا نوٹس لیں۔

یہاں جاری ایک بیان میں پی پی پی کے سیکرٹری جنرل نیئر بخاری نے کہا کہ پی ٹی آئی کے بانی کو جیل مینول سے ہٹ کر اضافی سہولیات فراہم کی جارہی ہیں۔

انہوں نے کہا کہ جیل مینوئل کے تحت ایکسرسائز مشین اور واکنگ ٹریک فراہم نہیں کیا جا سکتا، سوال ہے کہ کیا کسی اور قیدی کو بھی ایسی سہولیات فراہم کی جاتی ہیں۔

نیئر بخاری نے سوال کیا کہ پی ٹی آئی کے بانی کو جو سہولیات دی جارہی ہیں وہ جیل مینوئل کے مطابق ہیں یا نہیں۔

پی پی پی کے سیکرٹری جنرل نے مزید کہا کہ ’اڈیالہ جیل پنجاب کی وزارت داخلہ کے تحت آتی ہے اور وزیراعلیٰ مریم نواز کو اس معاملے کا نوٹس لینا چاہیے‘۔

نیئر بخاری نے کہا کہ مریم نواز وزارت داخلہ سے عمران خان کو فراہم کی جانے والی سہولیات کے بارے میں پوچھیں، انہوں نے کہا کہ انہیں جیل مینوئل کے مطابق اجازت نہیں ہے۔